ആളൂര്: ജില്ലാ പഞ്ചായത്തിന്റെ ആളൂര് ഡിവിഷനില് ഇത്തവണ വനിതാനേതാക്കളുടെ ഉശിരന്പോരാട്ടമാണ്.
ആളൂര് പഞ്ചായത്ത് മുഴുവനുള്പ്പെടുന്ന 24 വാര്ഡുകളും പുത്തന്ചിറ പഞ്ചായത്തിലെ ആറു വാര്ഡുകളും മാള പഞ്ചായത്തിലെ ഒമ്പതു വാര്ഡുകളുമടക്കം 39 വാര്ഡുകള് ഉള്പ്പെടുന്നതാണ് ആളൂര് ഡിവിഷന്.
എല്ഡിഎഫിനു സീറ്റ് നിലനിര്ത്താനുള്ള പോരാട്ടമെങ്കില് ഏതുവിധേനയും സീറ്റ് പിടിച്ചെടുക്കാനുള്ള പോരാട്ടത്തിലാണ് യുഡിഎഫും ബിജെപിയും. ജില്ലാ പഞ്ചായത്ത് പ്രസിഡന്റായിരുന്ന സിപിഎമ്മിലെ പി.കെ. ഡേവിസ് മാസ്റ്റര്ക്കായിരുന്നു കഴിഞ്ഞ തെരഞ്ഞെടുപ്പില് വിജയം. യുഡിഎഫ് സ്ഥാനാര്ഥിയായിരുന്ന നിലവിലെ യൂത്ത് കോണ്ഗ്രസ് സംസ്ഥാനപ്രസിഡന്റ് അഡ്വ. ഒ.ജെ. ജെനീഷിനെയാണ് പരാജയപ്പെടുത്തിയത്.
വിദ്യാര്ഥി- യുവജനപ്രസ്ഥാനത്തിലൂടെ പൊതുരംഗത്തേക്കു കടന്നുവന്ന മാള എഐഎം ലോ കോളജില് മൂന്നാംവര്ഷ നിയമവിദ്യാര്ഥിനി കാവ്യ രഞ്ജിത്താണ് യുഡിഎഫ് സ്ഥാനാര്ഥി. യൂത്ത് കോണ്ഗ്രസ് സംസ്ഥാന ജനറല് സെക്രട്ടറി, ഭാരതിയ ദളിത് കോണ്ഗ്രസ് ദേശീയ സോഷ്യല് മീഡിയ കോഓര്ഡിനേറ്റര്, തൃശൂര് ജില്ലാ ജനറല് സെക്രട്ടറി എന്നീ നിലകളിലും പ്രവര്ത്തിക്കുന്നുണ്ട്.
ആളൂര് പഞ്ചായത്തിലെ കുടുംബശ്രീ ചെയര്പേഴ്സണായ സിപിഎം അംഗം രാഗി ശ്രീനിവാസനാണ് എല്ഡിഎഫ് സ്ഥാനാര്ഥി. ജനാധിപത്യ മഹിളാ അസോസിയേഷന് പ്രവര്ത്തകയാണ്. കഴിഞ്ഞ നാലുവര്ഷം സിഡിഎസ് ചെയര്പേഴ്സണ് എന്ന നിലയിലും പ്രളയ- കോവിഡ് പ്രവര്ത്തനങ്ങളിലും സജീവമായിരുന്നു.
2008 മുതല് കഴിഞ്ഞ 17 വര്ഷമായി ആശാ പ്രവര്ത്തകയായി പ്രവര്ത്തിക്കുന്ന സജിനി സന്തോഷാണ് ബിജെപി സ്ഥാനാര്ഥി. 2010 ലും 2020 ലും ജനപ്രതിനിധിയായിട്ടുണ്ട്. മഹിളാമോര്ച്ചയുടെ തൃശൂര് ജില്ലാ ജനറല് സെക്രട്ടറി കൂടിയാണ്.